bayaan qiSSah-e-be-chaaragee kiyaa jaaYe! *

bayaan qiSSah-e-be-chaaragee kiyaa jaaYe!
jo dil kee reh gayee dil meN use kahaa jaaYe

yeh zindagee hai to ph`ir maut kis ko kehte haiN?
nah royaa jaaYe hai mujh` se nah hee haNsaa jaaYe!

tire Khayaal kee aasoodagee! mua'aZ-Allah!
yeh jab bh`ee aaYe hai, ik u'mr kaa gilaa jaaYe!

faaeeh-e-shehr bh`ee bikne lage sar-e-baazaar
Ghareeb-e-shehr kahaaN jaaYe aur kyaa jaaYe?

Gham-e-Hayaat, Gham-e-aarzoo, Gham-e-dunyaa!
Khudaa hee jaane kahaaN tak yeh silsilaa jaaYe!

bayaan-e-Gham se naheeN ham ko Khauf-e-ruswaayee
yeh Dar hai naam tiraa bh`ool kar nah aa jaaYe

suno yeh Sirf miree be-kasee kaa Zikr naheeN
woh Gham hai jis meN zamaaneh kaa Gham samaa jaaYe

a'jeeb cheez hai dil kaa mu,a'amilah "Sarwar"
kahaa nah jaaYe, nah hee bin kahr rahaa jaaYe!

غزل