raheen-e-Khud-sitaayee th`aa maiN kushtah-e-anaa rahaa *

raheen-e-Khud-sitaayee th`aa, maiN kushtah-e-anaa rahaa
"zabaan-o-dil ke darmiyaaN hameshah faaSilaa rahaa"

nigaah ik milee to th`ee, umeed kuch` baNdh`ee to th`ee
ph`ir is ke ba'd u'mr bh`ar GhamoN kaa silsilah rahaa

nishaan-e-Hasrat-o-alam, daleel-e-bekasee-o-Gham
jo ashk bh`ee th`amaa rahaa, jo dard bh`ee dabaa rahaa

nah jaane kitnee zindagee udh`eR-bun meN kaT gayee
umeed aap se rahee, Khayaal aap kaa rahaa

bataa,o apnaa kaun hai, kise ab aashnaa kaheN?
woh dil hee to rafeeq th`aa, jo woh gayaa to kyaa rahaa?

hazaar be-HuZ^oor hooN, magar maiN be-quSoor hooN
too dekh`ne kee cheez hai so maiN bh`ee dekh`taa rahaa!

fareb-e-arzoo rahaa qadam qadam yooN ham-safar
nah apnee hee Khabar rahee, nah teraa hee patah rahaa

maqaam-e-sarKhushee kahaaN, dayaar-e-ibtilaa meN hai
Ghareeb "Sarwar"-e-HazeeN hameshah be-nawaa rahaa

غزل