Ghazals | غزلیں


English اردو


Gham-e-dunyaa jo nah ho gaa, Gham-e-jaanaaN ho gaa **
Gham-e-dunyaa jo nah ho gaa Gham-e-jaanaaN ho gaa
gh`ar ujaRne kaa mire koyee to saamaaN ho gaa!

paas-e-Gham, paas-e-wafaa, paas-e-junooN, paas-e-Habeeb
aur tum i'shq ko kehte th`e keh aasaaN ho gaa?

ik Zaraa shorish-e-andoh-e-wafaa se ch`ooTooN
faiSelah ph`ir tiraa ai gardish-e-dauaaN! ho gaa

ai junooN! le to chalaa hai soo-e-gulshan ham ko
aur agar kal yehee gulshan jo bayaabaaN ho gaa?

maut kaa Gham hai agar aaj to kal fikr-e-Hayaat
gardish-e-waqt kaa yeh bh`ee koyee iHsaaN ho gaa!

ek muddat huyee afsurdah hai raftaar-e-Hayaat
kaun jaane koyee kab Hashr-badaamaaN ho gaa!

raas aaYe hameN barbaadee-e-hastee shaayad
ranj-o-Gham ho gaa nah andeshah-e-dauraaN ho gaa

chashm-e-nam shama' banee tere siyah-Khaaneh kee
yaad itnaa to tujh`e ai shab-e-hijraaN! ho gaa?

jee rahaa hooN isee ummeed pah shaayad hamdam
dard-e-dil hee mire andoh kaa darmaaN ho gaa

jaan "Sarwar" ne Gham-e-i'shq meN haaree aaKhir
kyaa Khabar th`ee keh yeh kaafir bh`ee musalmaaN ho gaa!