Ghazals | غزلیں


English اردو


miraa Zauq-e-muHabaat dekh`iYe kyaa gul kh`ilaataa hai
miraa Zauq-e-muHabbat dekhiYe kyaa gul kh`ilaataa hai
Khushee par Doobtaa hai dil, GhamoN par muskuraataa hai!

Hareem-e-naaz hai yeh! ek aataa, ek jaataa hai
tamaashah nit-nayaa shaam-o-saHar koyee dikh`aataa hai!

gilah kaisaa, shikaayat kis kee aur kaisee yeh be-kaifee?
yehee hotaa hai meree jaaN! kisee par dil jo aataa hai

rah-e-ulfat kaa har Zarrah miraa hamraaz-o-moonis hai
fasaanah koyee kehtaa hai, Ghazal koyee sunaataa hai!

tumhaare ba'd jo beetaa zamaanah, Zikr kyaa us kaa?
tumhaare saath` jo guZraa zamaanah, yaad aataa hai!

aseer-e-zindagaanee hooN, giriftaar-e-zamaanah hooN
miraa har taar-e-hastee ik nayaa nauHah sunaataa hai!

dar-o-deevaar meN aisee basee hai boo-e-jaanaanah
maiN jitnaa bh`oolnaa chaahooN, voh utnaa yaad aataa hai!

zamaanah-saaz too hotaa agar :Sarwar: to achh`aa th`aa
maZaaq-e-saadah teraa kab kisee ko raas aataa hai!