jo thaa ma'loom woh hai naa-ma'loom

jo thaa ma'loom, woh hai naa-ma'loom
"so bhee ik u'mr meN huwaa ma'loom!"

ham jo aaNkheN bichhaYe baiThe haiN
kaun aa jaaYe kab, Khudaa ma'loom!

yeh sawaal-o-jawaab kyaa ma'nee?
kyaa naheeN tujh ko mudd,a'a ma'loom?

boo-e-gul par KhizaaN meN kyaa guzree
kuchh tujhe bhee hai ai Sabaa! ma'loom?

baat karte ho dost-daaree kee
ham ko sab hai Zaraa Zaraa ma'loom!

wehm ik shakl hai Haqeeqat kee!
yeh Haqeeqat kisee ko kyaa ma'loom?

beKhudee yaa Khudee se kyaa HaaSil?
kab huwaa apnaa kuchh pataa ma'loom?

koyee apnaa naheeN zamaaneh meN
Khair se yeh bhee ho gayaa ma'loom

baat jo bhee hai woh Khayaalee hai
HaaSil-e-aah-e-naarasaa ma'loom!

"Sarwar"-e-Khastah-Haal kaisaa hai?
kuchh karo to ataa-pataa ma'loom!

غزل