Ghazals | غزلیں


English اردو


ashk-e-ulfat kaa yeh anjaam? Khudaa Khair kare!
ashk-e-ulfat kaa yeh anjaam? Khudaa Khair kare!
aur voh bh`ee yooN sar-e-a'am? Khudaa Khair kare!

lab pe aayaa hai tiraa naam, Khudaa Khair kare!
ho nah jaayeN kaheeN badnaam, Khudaa Khair kare!

jab bh`ee haath`oN kee lakeeroN pah naz^ar Daalee hai
maiN ne dekh`aa hai tiraa naam! Khudaa Khair kare!

aah! arbaab-e-Khirad kee yeh subuk-saamaanee!
Khud-shanaasee huyee ilzaam, Khudaa Khair kare!

aazmaa,ish hai yeh aadaab-e-junooN kee shaayad
koyee aayaa hai lab-e-baam, Khudaa Khair kare!

jab kabh`ee zeest meN ham Hadd-e-yaqeeN se guZre
ban gaYe bandah-e-auhaam, Khudaa Khair kare!

sar jh`ukaaye huYe chlataa hooN, magar ahl-e-Khirad
is ko kehte naheeN Islam, Khudaa Khair kare!

yaad hai, kaun hai yeh :Sarwar:-e-aavaara-Khisaal?
aap kaa bandah-e-bedaam! Khudaa Khair kare!