ulajh` ke reh gaYe hastee ke taane baane meN

ulajh` ke reh gaYe hastee ke taane baane meN
tamaam ho gayee ik u'mr is fasaane meN!

mile gee baat kahaaN yeh bh`alaa zamaane meN?
mazaa kuch` aur hai tujh` se fareb khaane meN!

mujh`e hazaar tamannaa, tire qareeb aa,ooN
tujh`e yeh aik takalluf naz^ar mailaane meN!

zamaanah bh`ool gayaa chalte chalte apnee raah
koyee to baat hai aaKhir mire fasaane meN!

shikast-o-fatH kaa ma'yaar kaash! aisaa ho
koyee nah u'zr ho donoN ko sar jh`ukaane meN

:fareb-Khurdah-e-Husn-e-KhulooS hooN aisaa:
hazaar vasvase haiN us se dil lagaane meN!

:butaan-e-vehm-o-gumaaN? laa-ilaahah-ill-Allah!:
maiN Khud ko bh`ool gayaa tujh` ko aazmaane meN

fuGhaaN! keh Khwaar huwaa koo-e-yaar meN :Sarwar:
bh`aram nah us kaa rahaa roz aane jaane meN!

غزل