kisee ko apne dard-e-i'shq meN hamraaz kyaa karte?

kisee ko apne dard-e-i'shq meN hamraaz kyaa karte?
hamaaraa Haal hee jab ho gayaa Ghammaaz, kyaa karte?

maqaam-e-i'shq meN sood-o-ziyaaN kee kyaa Haqeeqat hai?
Hisaab-e-soz kyaa karte, shumaar-e-saaz kyaa karte?

kisee ko pooch`ne vaalaa kahaaN hai iss zamaane meN?
bane majboor ho kar ham bh`ee dunyaa-saaz, kyaa karte?

koyee th`aa meHv Khud meN aur koyee mast-e-zamaanaah th`aa!
yehee jab raNg-e-meHfil th`aa to :Sarwar Raz: kyaa karte?

hameN kab shauq th`aa dunyaa se haath` apnaa uTh`aane kaa?
magar kuch` ho gaye Haalaat hee naasaaz, kyaa karte?

tamaam ahl-e-muHabbat uTh` gaye pehlee hee manzil meN!
jo baaqee reh gaye th`e naam ke damsaaz, kyaa karte?

bh`alaa ahl-e-Khirad se kyaa umeed-e-dostee rakh`te?
unheN apnee paRee th`ee! ph`ir yeh Heelah-saaz kyaa karte?

naheeN gar iKhtiyaar-e-yak-nafas haNgaam-e-hastee meN
azal ke par-bareedah himmat-e-parvaaz kyaa karte?

guZargaah-e-fanaa meN ek haiN donoN agar :Sarwar:
Gham-e-anjaam ho yaa shikvah-e-aaGhaaz! kyaa karte?

غزل