dehr meN Harf-e-muHabbat a'am honaa chaahiYe! *

dehr meN Harf-e-muHabbat a'am honaa chaahiYe
zindagee shaa,istah-e-Islam honaa chaahiYe!

aadamee ko Khoogar-e-aalaam honaa chaahiYe
har saHar meN kuch` to raNg-e-shaam honaa chaahiYe!

har taqaaZ^ah i'shq kaa be-aSl hai! be-aSl hai!
dard ko apnaa hee Khud in,a'am honaa chaahiYe

miT hee jaaYe gaa kisee din yeh dil-e-dar-aashnaa
is fasaaneh kaa yehee anjaam honaa chaahiYe

shikwah-e-dunyaa kahaaN tak? is se kuch` HaaSil naheeN
tum ko apne kaam se bas kaam honaa chaahiYe!

manzil-e-dil meN bh`alaa kyaa kaam a'ql-o-hosh kaa?
manzil-e-dil meN junooN se kaam honaa chaahiYe

she'r meN kh`ul jaaYeN ge raaz-o-niyaaz-e-aagahee
dil ko lekin maa,il-e-ilhaam honaa chaahiYe

log kehte haiN tumheN deewaanah ai "Sarwar" to kyaa
kuch` to dunyaa meN tumhaaraa naam honaa chaahiYe!

غزل