yeh achh`aa huwaa, woh Khafaa ho gayaa *

yeh achh`aa huwaa, woh Khafaa ho gayaa!
chalo yooN hee ik silsilaa ho gayaa!

shab-e-Gham a'jab saaniHaa ho gayaa
tumhaaraa taSawwur Khudaa ho gayaa!

zamaaneh kee be-chehragee dekh` kar
maiN Khud apnaa hee aa,eenaa ho gayaa

a'daavat muHabbat kaa hee a'ks hai
woh naa-aashnaa, aashnaa ho gayaa!

tamannaa hee woh kyaa jo pooree huyee
"woh wa'dah hee kyaa jo wafaa ho gayaa>"

takalluf meN aaYe nah tum aur Gham
baRh`aa aur baRh` kar dawaa ho gayaa!

Khudaa jaane kyaa yaad aayaa mujh`e
yooN hee Zikr kuch` aap kaa ho gayaa

paRe Khaak "Sarwar" tire i'shq par
tiraa Haal yeh kyaa se kyaa ho gayaa!

غزل