dil-lagee hee dil-lagee meN dil kisee kaa ho gayaa *

dil-lagee hee dil-lagee meN dil kisee kaa ho gayaa
kyaa kaheN, kaise kaheN, kyoN ho gayaa, kyaa ho gayaa?

dil kaa luTnaa ek dunyaa ko tamaashaa ho gayaa
haaYe! yooN baiTh`e-biTh`aaYe kyaa se yeh kyaa ho gayaa!

zindagee kab tak uTh`aatee dard kaa baar-e-giraaN?
shaam-e-Gham aayee to us kaa bh`ee saweraa ho gayaa!

ph`ir hawaa meN hai wohee be-naam boo-e-pairahan
kyaa tiree jaanib se ph`ir koyee ishaaraa ho gayaa?

dard th`aa manzil-ba-manzil aur aaNsoo gaam-gaam
bas isee Soorat hamaaraa bh`ee guZaaraa ho gayaa

maiN rahaa Khaamosh paas-e-a'ashiqee se u'mr bh`ar
log yeh samjh`e mire Gham kaa madaavaa ho gayaa!

kam naheeN th`ee yoorish-e-GhamhaaYe-dunyaa jaan par
dil ko kyaa soojh`ee muHabbat meN divaanaa ho gayaa?

kar rahe ho a'ashiqee "Sarwar" magar yeh soch lo!
kal na pach`taanaa keh maiN dunyaa meN ruswaa ho gayaa!

غزل