vaaraftagee-e-shauq kee shiddat na pooch`iYe!

vaaraftagee-e-shauq kee shiddat nah pooch`iYe!
kyaa hai dil-e-Kharaab kee Haalat? nah pooch`iYe!

yeh i'shq hai keh ek muSeebat? nah pooch`iYe
aavaaragee-e-koo-e-malaamat nah pooch`iye!

ham to dar-e-Habeeb ke sajdah-guZaar haiN
ham se rumooz-e-zuhd-o-i'baadat nah pooch`iYe!

guZree hai yooN uchaTtee naz^ar se kitaab-e-zeest
u'nvaan kyaa hai? kyaa hai i'baarat? na pooch`iYe!

yeh dekh`iye keh is meN hai gum ek kaa,inaat
kyaa cheez hai yeh Harf-e-muHabbat? nah pooch`iYe!

paamaal-e-Sad-umeed haiN, meHroom-e-aarzoo!
guZree hai jaan-o-dil pe qiyaamat! nah pooch`iYe!

kab un se ho sakaa hai mire dard kaa i'laaj?
is per takallufaat-e-a'yaadat? nah pooch`iYe!

voh be-niyaaz kab nah rahaa raah-e-a'am se?
"Sarwar" aur us kaa raNg-e-t^abeea't? nah pooch`iYe!

غزل