zamaanah meN koyee tum saa naheeN hai *

zamaanah meN koyee tum saa naheeN hai
Haqeeqat hai yeh afsaanah naheeN hai!

muHabbat kyaa hai tum ko kyaa bataaYeN
tumheeN keh do muHabbat kyaa naheeN hai!

muHabbat meN sukooN kaa Zikr kaisaa?
"muHabbat dh`oop hai, saayaa naheeN hai"

uTh`aa kartee hai dil meN hook akcar
Khudaa ma'loom kyaa hai kyaa naheeN hai!

Khudaa ma'loom kyoN, jis dil meN tum ho
woh tanhaa reh ke bh`ee tanhaa naheeN hai

hamaaraa kaish kaish-e-a'ashiqee hai
hameN anjaam kee parwaa naheeN hai

taqaaZ^aa-e-muHabbat hai Khamoshee
magr ab Z^abt^ kaa yaaraa naheeN hai

woh "Sarwar" haaN! wohee deewaanah "Sarwar"
bataa,o kis jagah ruswaa naheeN hai?

غزل