sukooN jo dil ko naheeN, jaaN ko jo qaraar naheeN *

sukooN jo dil ko naheeN, jaaN ko jo qaraar naheeN
yeh imtiHaan-e-muHabbat hai, kaar-o-baar naheeN!

sukoon-e-dil ko zamaanah meN Dh`ooNDne waalo!
yehee sukooN to kaheeN wajh-e-iZ^t^iraar naheeN?

hai koyee aisaa jo gulshan ko ph`ooNk de baRh` kar?
kisee bh`ee ph`ool ke pehloo meN kyaa sharaar naheeN?

jahaaN meN Harf-e-muHabbat hai avval-o-aaKhir
siwaaYe is ke kisee shai kaa e'tibaar naheeN!

nah pooch` dard kee kin manziloN se aaYe haiN
hameN Gham-e-rasan-o-e'tibaar-e-daar naheeN!

jo kar sako to sar-raah-e-a'am faash karo
hamaaraa raaz-e-muHabbat keh aashkaar naheeN

hujoom-e-shauq kee sar-garmiyaaN, mua'aZ-Allah!
maiN apne Husn-e-muHabbat se sharmsaar naheeN

raheN ge shehr-e-nigaar-e-junooN meN ab "Sarwar"
keh us dayaar se achh`aa koyee dayaar naheeN

غزل