raftah raftah dil hamaaraa teraa deewaanah huwaa *

raftah raftah dil hamaaraa teraa deewaanah huwaa
th`aa Zaraa saa waaqia' us par yeh afsaanah huwaa!

ab sazaa jo bh`ee mile, jaisee mile, jitnee mile
haaN! huwaa e'laan-e-ulfat aur rindaanah huwaa

hai fiZ^aa Khaamosh, weHShat chaar-soo, bojh`al hawaa
is t^araf kis kaa guZar ai koo-e-jaanaanah! huwaa

miT gayaa jab farq ulfat meN niyaaz-o-naaz kaa
naaz bh`ee Soorat badal kar ph`ir niyaazaanah huwaa

shabnamee ph`ooloN pah jaise Doobte sooraj kee dh`oop
yooN Hareem-e-aarzoo meN aap kaa aanaa huwaa

zindagee jis lamHah ham-aawaaz-e-fit^rat ho gayee
rooH jannat-aashnaa aur dil paree-Khaanah huwaa

kufr-o-eemaaN kee kashaa-kash se rahaa aazaad i'shq
raNg-e-Ka'bah meN yooN shaamil raNg-e-butKhaanah huwaa

mar gayaa kal raat "Sarwar" a'ashiqee meN haaYe haaYe!
th`aa zamaanah bh`ar meN deewaanah woh ik maanaa huwaa

غزل