mire naSeeb meN dunyaa ke Gham uTh`aanaa th`aa *

mire naSeeb meN dunyaa ke Gham uTh`aanaa th`aa
Gham-e-Habeeb se baRh` kar Gham-e-zamaanah th`aa!

nigaar-Khaanah-e-ummeed ik bahaanaa th`aa
kaheeN to is dil-e-kambaKht ko lagaanaa th`aa!

nah rokeN ahl-e-chaman ham ko Khaak uRaane se
yaheeN kaheeN pah hamaaraa bh`ee aashyaanaa th`aa

maiN apne aap se Ghaafil rahaa hooN yooN jaise
wujood meraa kisee aur kaa Th`ikaanaa th`aa!

Khudaa-shanaas huwaa Khud se aashnaa ho kar
yehee gunah miree tajdeed kaa bahaanaa th`aa

tiree nawaazish-o-jood-o-karam ke maiN qurbaaN!
sitam bohat th`aa magar ph`ir bh`ee dostaanaa th`aa!

shab-e-umeed se le kar shab-e-judaayee tak
Khayaal-o-Khwaab-o-tasawwur kaa taanaa baanaa th`aa

tamaam ho gayaa aaKhir fasaanah-e-"Sarwar"
diwaanah mar gayaa, kyaa Khoob woh diwaanah th`aa

غزل