hameN yaad aayeeN akcar tiree dilbaree kee baateN **

hameN yaad aayeeN akcar tiree dilbaree kee baateN
tiree dostee kee baateN, tiree dushmanee kee baateN!

jo nah hotaa paas-e-ulfat bh`aree anjuman meN hote
tiree be-ruKhee ke qiSSe, miree bekasee kee baateN

dil-e-zaar! kyaa huwaa hai, yah junooN naheeN to kyaa hai?
kabh`ee aah-e-besabab hai, kabh`ee beKhudee kee baateN

zahe meree be-zabaanee keh jo rashk-e-Sad-zabaaN hai
kabh`ee gosh-e-dil se suniYe miree Khaamushee kee baateN

yeh adaa-e-beniyaazee! yeh adaa-e-beniyaazee!
kare jaise ajnabee se koyee ajnabee kee baateN

gahe aarzoo-e-dil haiN, gahe aabroo-e-ulfat
yehee dil lagee kee baateN, yehee dil lagee kee baateN

tiree dil-dehee ke Sadqeh, tiree dostee ke qurbaaN
wohee Khaaanah-saaz shikwe, wohee kaj-rawee kee baateN

nah hee fikr-e-a'aqibat hai, nah hee kaavish-e-zamaanah
hameN raas aa gayee haiN Gham-e-a'ashiqee kee baateN

nah to naaz-o-dil-rubaayee, nah hee shaan-e-kaj-adaayee
hameN bh`aa gayee haiN z^aalim tiree saadagee kee baateN

nah hee daad-e-bazm "Sarwar", nah sitaayish-e-zamaanah
tire kaam Khoob aayeeN tiree shaai'ree kee baateN!

غزل