teraa guZar idh`ar jo ba-raNg-e-Sabaa huwaa **

teraa guZar idh`ar jo ba-raNg-e-Sabaa huwaa
aayee bahaar, yaad kaa pattah haraa huwaa!

har saaNs aarzoo,oN kaa ik silsilah huwaa
is t^araH qismatoN kaa miree faiSilah huwaa

tum aaYe th`e to ek zamaanah th`aa mere saath`
tum kyaa judaa huYe, miraa saayah judaa huwaa

apne hee aansoo,oN peh mujh`e aa gayee haNsee
kal raat mere saath` a'jab maajiraa huwaa!

kartaa hai teraa saayah-e-deewaar bh`ee gureZ
mujh` saa nah dehr meN koyee be-aasraa huwaa

achh`aa kiyaa jo aap ne mujh` ko bh`ulaa diyaa
th`aa zindagee meN ik yehee kaaNTaa lagaa huwaa!

jo Gham mile zamaanah se saare siwaa mile
aur dil milaa to woh th`aa GhamoN se bh`araa huwaa

anjaan jaan boojh` ke ban jaaiYe HuZ^oor!
reh jaaYe kis liYe yehee tasmaa lagaa huwaa?

nabZ^-e-Hayaat, shama'-e-umeed, aarzoo-e-waSl
anjaam sab kaa a'ashiqee meN ek saa huwaa!

josh-e-Kharosh hai nah woh pehle se walwale
baiTh`e biTh`aaYe aap ko "Sarwar" yeh kyaa huwaa?

غزل