aah! dushwaaree-o-sauhaan-e-safar! kyaa keeje?

aah dushwaaree-o-sauhaan-e-safar! kyaa keeje!
kaT gaYe raah meN jitne th`e shajar, kyaa keeje!

Sabr achh`aa sahee ai dost! magar kyaa keeje?
Khud-baKhud aaNkh` huyee jaatee hai tar, kyaa keeje?

SubH-dam roYe idh`ar, shaam udh`ar, kyaa keeje?
zindagee apnee huyee aisee basar kyaa keeje!

baat shaayad naheeN kehne kee magar kyaa keeje!
bh`oolne par bh`ee woh yaad aaYe agar kyaa keeje?

ek mushkil ho to maiN Zikr karooN mushkil kaa
zaKhm-e-dil, zaKhm-e-alam, zaKhm-e-jigar kyaa keeje!

waqt ne naqsh-e-qadam bh`ee to naheeN rehne diYe
zindagee kyaa hai? faqat^ raah-guZar! kyaa keeje!

:zindagee hai to KhizaaN ke bh`ee guZar jaaYeN ge din:
kaT hee jaaYe gaa kisee t^araH safar, kyaa keeje!

woh muHabbat kee kalee dil meN ji sar-bastah th`ee
ban gayee dekh`iYe aaKhir ko sharar, kyaa keeje!

jo bh`ee "Sarwar"! tujh`e kehnaa hai bataa de ik baar
shiwah-e-jaur ba-andaaz-e-digar kyaa keeje?

غزل