jo Gham bh`ee dil-o-jaan se pyaaraa naheeN hotaa **

jo Gham bh`ee dil-o-jaan se pyaaraa naheeN hotaa
us Gham se muHabbat meN guZaaraa naheeN hotaa!

jab tak tiree naz^roN kaa ishaaraa naheeN hotaa
is dil ko koyee Haal gawaaraa naheeN hotaa!

dunyaa jo hai ummeed pah qaa,im to balaa se
apnaa to umeedoN pah guZaaraa naheeN hotaa!

har mauj se kyaa kh`elnaa, har mauj se kyaa kaam?
har mauj ke daaman meN kinaaraa naheeN hotaa

dil bh`ee hai Khudaa-daad, muHabbat bh`ee Khudaa-daad
aa jaaYe jo dil to koyee chaaraa naheeN hotaa!

tum HaaSil-e-Gham, HaaSil-e-dil, HaaSil-e-jaaN ho
eHsaas tumhen kyaa yeh Khudaa-raa! naheeN hotaa?

kyaa jaaniYe kyaa guZre hai is dard meN us dam
jab jaaN se guZarne kaa bh`ee yaaraa naheeN hotaa

rone se nah roko hameN ab i'shq meN yaaro!
ashkoN pah kisee kaa bh`ee ijaaraa naheeN hotaa

yeh dard-e-muHabbat baRaa jaaN-lewaa hai "Sarwar"!
ik baar hee uTh`taa hai do-baarah naheeN hotaa!

غزل