nigaaheN milaanaa, nigaaheN churaanaa!

nigaaheN milaanaa, nigaaheN churaanaa!
koyee un se seekh`e nazar meN samaanaa!

bohat sun chuke raNj-o-Gham kaa fasaanaa
Zaraa ek saaGhar idh`ar to baRh`aanaa!

yehee chand aaNsoo, yehee chand aaheN
miree zindagee kaa banee haiN bahaanaa!

yehee bazm-e-faanee, yehee daur-e-imkaaN!
yehee, kyaa yehee hai tiraa aastaanaa?

yeh hai bazm-e-saaqee, yahaaN hosh kaisaa?
yahaaN to Khudee kaa naheeN hai Th`ikaanaa

tumheN kyaa Kh`abar mere dil kee Khalish kee
Zaraa ph`ir to ik baar naz^areN milaanaa!

voh :Sarwar:! vohee paarsaa! rind-mashrab?
kahaaN us ne seekh`aa hai peenaa pilaanaa!

غزل