i'shq kyaa kyaa fareb kh`aataa hai **

i'shq kyaa kyaa fareb kh`aataa hai
Husn kyaa sho'bade dikh`aataa hai!

Zikr meraa tire fasaaneh meN
kis qadar muKhtaSar saa aataa hai!

zindagee hai keh ek melaa hai
ek aataa hai, ek jaataa hai!

bad-gumaaN too nah ho mire Gham se
aate aate hee Sabr aataa hai!

hai zameeN saKht, aasmaaN hai door
dil kahaaN qismat aazmaataa hai?

ham to sharmindah-e-Hayaat huYe
aap ko kyoN Hijaab aataa hai?

"roz martaa hooN, roz jeetaa hooN"
koyee yooN mujh` ko aazmaataa hai

Khud ba-Khud aaj aaNkh` bh`ar aayee
kaun dil ke qareeb aataa hai?

tujh` saa deewaanah kaun hai "Sarwar"?
zaKhm kh`aataa hai, muskuraataa hai!

غزل