hameN yaad aayeeN akcar tiree dilbaree kee baateN!

hameN yaad aayeeN akcar tiree dilbaree kee baateN!
tiree dostee kee baateN, tiree dushmanee kee baateN

jo nah hotaa paas-e-ulfat, bh`aree anjuman meN hote
tiree be-ruKhee ke qiSSe, miree be-kasee kee baateN

dil-e-zaar kyaa huwaa hai? yeh junooN naheeN to kyaa hai?
kabh`ee aah-e-be-sabab hai, kabh`ee be-Khudee kee baateN

nah to naaz-o-dilrubaa,ee, nah hee shaan-e-kaj-adaa,ee
hameN bh`aa gayee haiN z^aalim! tiree saadagee kee baateN

zahe meree be-zabaanee! keh jo rashk-e-sad-zabaaN hai!
kabh`ee gosh-e-dil se suniYe miree Khamshee kee baateN

yeh adaa-e-be-niyaazee! yeh adaa-e-be-niyaazee!
kare jaise ajnabee se, koyee ajnabee kee baateN!

nah hee fikr-e-a'aqibat hai, nah hee Khwaahish-e-zamaanah
hameN raas aa gayee haiN Gham-e-a'ashiqee kee baateN

gahe aarzoo-e-dil haiN, gahe aabroo-e-ulfat
yehee dil-lagee kee baateN, yehee dil-lagee kee baateN!

tiree dildehee ke Sadqeh, tiree dostee ke qurbaaN!
vohee Khaanah-saaz shikve, vohee kaj-ravee kee baateN!

nah hee daad-e-bazm :Sarwar:! nah sitaa,ish-e-zamaanah
tire kaam Khoob aayeeN, tiree shaai'ree kee baateN!

غزل