roz jeete haiN, roz marte haiN **

roz jeete haiN, roz marte haiN
u'mr ham yooN tamaam karte haiN!

mushkilaat-e-wafaa bajaa lekin
jo bh`ee bantaa hai kar guZarte haiN

bekasee kaa yeh apnee a'alam hai
apne saaYe se Khud hee Darte haiN!

i'shq kee manzileN haiN aur ham haiN
kabh`ee chalte, kabh`ee Th`eharte haiN

woh din aaYe keh aarzoo nah rahe
ik isee aarzoo meN marte haiN

tere aane se dekh` mere gh`ar
kitne sooraj naYe ubh`arte haiN!

jo muHabbat ko kh`el samjh`e haiN
chaRh`te daryaa meN kyoN utarte haiN?

hai yehee kaam ham ko SubH-o-shaam
Zikr teraa mudaam karte haiN

i'shq meN len-den kyaa "Sarwar"
Khud hee karte haiN, Khud hee bh`arte haiN

غزل