dil-e-naadaaN tamaashaa ho gayaa hai **

dil-e-naadaaN tamaashaa ho gayaa hai
muHabbat meN diwaanaa ho gayaa hai!

yehee hai intihaa-e-i'shq shaayad
Gham apnaa hee madaawaa ho gayaa hai

uTh`aa kartee hai dil meN hook akcar
Khudaa jaane mujh`e kyaa ho gayaa hai!

GhamoN kaa be-kinaarah woh samandar
simaT kar ab kinaaraa ho gayaa hai

naheeN jo ban sakaa ab tak kisee kaa
hamaaraa dil usee kaa ho gayaa hai!

bahaareN ph`ir jawaaN hone lagee haiN
kaheeN Khoon-e-tamannaa ho gayaa hai!

woh ik aaNsoo jo tere Gham meN Tapkaa
wohee baRh` kar fasaanaa ho gayaa hai

umeedoN ke sahaare jee rahaa hooN
umeedoN par guZaaraa ho gayaa hai!

tumheN shaayad naheeN ma'loom lekin
yeh dil kab kaa tumhaaraa ho gayaa hai

muSaa,ib se bh`aree dunyaa meN "Sarwar"!
Gham-e-ulfat sahaaraa ho gayaa hai

غزل