jigar sulagtaa huwaa, dil bujh`aa bujh`aa ho gaa **

jigar sulagtaa huwaa, dil bujh`aa bujh`aa ho gaa
Khabar nah th`ee Silah-e-a'ashiqee buraa ho gaa!

Khujistah-sar koyee, koyee shikastah-paa ho gaa!
yeh raah-e-i'shq hai ab is meN aur kyaa ho gaa?

ik ashk-e-Gham hee miree zindagee kaa HaaSil hai
jo yeh bh`ee haath` se jaataa rahaa to kyaa ho gaa?

hujoom-e-yaas se dil gh`uT gayaa shab-e-hijraaN
ziyaadah Hashr meN kuch` aur kyaa bapaa ho gaa?

liYe to jaataa hai mujh` ko kahaaN kashaaN ai dil!
bikh`ar gayaa maiN bh`aree bazm meN to kyaa ho gaa?

Khabar hai garm sar-e-daar mere jaane kee
sunaa hai aaj muHabbat kaa faiSilah ho gaa!

kured letaa hooN yaadoN kee raakh` maiN akcar
yaheeN kaheeN se dh`uwaaN i'shq kaa uTh`aa ho gaa!

Khamoshee aap kee be-wajh ho naheeN saktee
naz^ar ne kuch` kahaa aur dil ne kuch` sunaa ho gaa!

yooN hee to bazm se be-aabroo naheeN niklaa
Z^aroor kuch` nigah-e-shauq ne kahaa ho gaa!

rakh`aa hai kyaa bh`alaa, kyoN pooch`te ho "Sarwar" ko?
diwaanah mar gayaa, tum ne bh`ee to sunaa ho gaa!

غزل