majboor-e-muHabbat hooN gunahgaar naheeN hooN

majboor-e-muHabbat hooN gunahgaar naheeN hooN
maiN gardish-e-hijraaN kaa sazaawaar naheeN hooN

ik jaam meN behke maiN woh maiKhwaar naheeN hooN
yeh kis ne kahaa SaaHeb-e-kirdaar naheeN hooN

wallah! keh dunyaa se maiN bezaar naheeN hooN
bas yeh hai keh maiN us kaa t^alabgaar naheeN hooN

Khud apnee i'naayaat kaa maSloob hooN aisaa
shaa,istah-e-daam-e-rasan-o-daar naheeN hooN

deewaanah hooN, laa-raib hooN deewaanah wa-lekin
yeh baat Ghalat^ hai keh maiN hushyaar naheeN hooN

be-baal-o-paree meree zamaaneh peh a'yaaN hai
woh Haal hai maiN apnee bh`ee Gham-Khwaar naheeN hooN

Khud se hee miree jaNg hai maidaan-e-Khudee meN
auroN se to maiN bar-sar-e-paikaar naheeN hooN

ik Harf-e-muHabbat hooN Zaraa paRh ke to dekh`o
aasaaN naheeN to aisaa bh`ee dushwaar naheeN hooN

maiN Khud peh a'yaaN hooN sar-e-haNgaamah-e-hastee
saayeh kee t^araH gum pas-e-deewaar naheeN hooN

hooN Khud se bh`ee aagaah, zamaaneh se bh`ee aagaah
momin hooN pah begaanah-e-zunnaar naheeN hooN

apnee hee Haqeeqat se jo begaanah ho "Sarwar"
aisaa to maiN mast-e-mai-e-pindaar naheeN hooN

غزل