go chaak rahaa is dil-e-naashaad kaa daaman

go chaak rahaa is dil-e-naashaad kaa daaman
haath`oN se naheeN ch`ooTaa tiree yaad kaa daaman!

ik u'mr chalaayaa kiyaa woh teshah-e-ulfat
pyaasaa hee rahaa Hasrat-e-Farhaad kaa daaman!

Allah re but-Khaanah-e-hastee kee Kharaabee!
ch`ooTaa nah kabh`ee is sitam-eejaad kaa daaman

shunwaayee miree kab huyee us bazm-e-t^arab meN
ph`ailaayaa bohat giryah-e-faryaad kaa daaman!

uljh`aa to kisee t^araH sulajh`ne meN nah aayaa
daamaan-e-taSawwur se tiree yaad kaa daaman!

aazaad rahaa Halqah-e-har-daam-e-Khirad se
maiN aur mire i'shq-e-Khudaa-daad kaa daaman!

"ai Khaanah-bar-andaaz-e-chaman kuch` to idh`ar bh`ee!"
hai daad-t^alab kushtah-e-bedaad kaa daaman!

"Sarwar"! yeh mujh`e faKhr hai, ilzaam-e-Khudee se
hai paak miree fit^rat-e-aazaad kaa daaman

غزل