ham huwe gardish-e-dauraaN se pareshaaN kyaa kyaa

ham huwe gardish-e-dauraaN se pareshaaN kyaa kyaa!
kyaa th`aa afsaanah-e-jaaN aur th`e u'nwaaN kyaa kyaa!

har nafas ik nayaa afsaanah sunaa kar guzraa
dil peh phir beet gayee shaam-e-GhareebaaN kyaa kyaa!

tere aawaarah kahaaN jaaYeN, kise apnaa kaheN?
tujh` se ummeed th`ee ai shehr-e-nigaaraaN kyaa kyaa!

bandagee Husn kee jab se huyee me'raaj-e-i'shq
sajdah-e-kufr banaa HaaSil-e-eemaaN kyaa kyaa!

faaSile aur baRhe manzil-e-gumkardah ke
aur ham karte rahe zeest ke saamaaN kyaa kyaa!

dh`oop aur ch`aa,oN kaa woh kh`el! a'yaaza" billaah!
raNg dekh`e tire ai u'mr-e-gurezaaN kyaa kyaa!

haaYe yeh laZZat-e-aazaar-e-shikastahpaayee
ham ne Khud Dh`ooND liYe apne bayaabaaN kyaa kyaa!

Haif "Sarwar"! tujh`e aiyyaam-e-KhizaaN yaad naheeN?
i'shq meN hai tujh`e ummeed-e-bahaaraaN kyaa kyaa!

غزل