koochah koochah, nagar nagar dekh`aa

koochah koochah, nagar nagar dekh`aa
Khud meN dekh`aa use agar dekh`aa!

qiSSah-e-zeest muKhtaSar dekh`aa
jaise ik Khwaab raat bh`ar dekh`aa

dar hee dekh`aa nah too ne gh`ar dekh`aa
zindagee! tujh` ko Khoob kar dekh`aa

koyee Hasrat rahee nah us ke ba'd
us ko Hasrat se ik naz^ar dekh`aa

ham ko dair-o-Haram se kyaa nisbat?
us ko dil meN hee jalwah-gar dekh`aa

dard meN, raNj-o-Gham meN, HirmaaN meN
aap ko Khoob dar-ba-dar dekh`aa

Haal-e-dil deedanee miraa kab th`aa?
dekh`taa kaise? haaN! magar dekh`aa

sach kaho bazm-e-she'r meN tum ne
koyee "Sarwar" saa be-hunar dekh`aa?

غزل