roz-o-shab is meN bapaa shor-e-qiyaamat kyaa hai?

roz-o-shab is meN bapaa shor-e-qiyaamat kyaa hai?
yeh miraa dil hai keh aa,eenah-e-Hairat? kyaa hai?

baat karne meN bataa,o tumheN zeHmat kyaa hai?
ik naz^ar bhee nah uThe, aisee bhee aafat kyaa hai?

jaan kar toR diyaa rishtah-e-daam-e-ummeed
"aaj mujh par yeh khulaa raaz keh jannat kyaa hai!"

naalah-e-neem-shabee, aah-o-fuGhaan-e-saHaree
gar naheeN haiN yeh i'baadat, to i'baadat kyaa hai?

mujh ko aaGhaaz-e-muHabbat se hee furSat kab hai?
kyaa bataa,ooN tujhe anjaam-e-muHabbat kyaa hai?

"Mir"-o-"Iqbal" se, "Ghalib" se yeh poochheN SaaHeb!
shaa,i'ree cheez hai kyaa, she'r kee a'z^mat kyaa hai?

jab se maiN deen-e-muHabbat meN giriftaar huwaa
kufr-o-eemaan kee, wallaah! Haqeeqat kyaa hai?

ham GhareeboN peh jo dastoor-e-zabaaN-bandee hai
koyee majbooree hai teree keh hai a'adat? kyaa hai?

Harf-o-ma'nee huwe be-rabt^, qalam TooT gayaa
manzil-e-shauq meN yeh a'alam-e-weHshat kyaa hai?

Doob kar Khud meN pataa yeh chalaa, har soo too hai!
ham-nisheeN! tafraqah-e-jalwat-o-Khalwat kyaa hai?

kaam se rakhtaa hooN kaam apnaa sadaa hee yaaro!
mujh se dunyaa ko bhalaa phir yeh shikaayat kyaa hai?

ek pal chain naheeN "Sarwar"-e-badnaam tujhe!
kuchh to ma'loom ho, aaKhir tiree niyyat kyaa hai?

غزل