woh taSawwur meN bhee mujh par mehrbaaN hotaa naheeN

woh taSawwur meN bhee mujh par mehrbaaN hotaa naheeN
rabt^ aaKhir kyoN hamaare darmiyaaN hotaa naheeN?

dil peh jo guzre hai naz^roN se a'yaaN hotaa naheeN
haaYe kyaa keejiYe keh qiSSah yeh bayaaN hotaa naheeN

a'ashiqee meN maatam-e-aashuftagaaN hotaa naheeN?
aap hee keh deN keh aisaa kab, kahaaN hotaa naheeN?

dil badalte der kyaa lagtee hai ahl-e-dehr ko
kyaa bataaYeN ham tumheN kyaa kyaa yahaaN hotaa naheeN

ham samajhte the keh fikr-e-zindagee miT jaaYe gee
chaarah-saaz-e-zeest kyoN soz-e-nihaaN hotaa naheeN?

ek dunyaa dekhiYe naGhma-saraa-e-a'ish hai
kyoN Gham-e-insaaN meN koyee nauHah-KhwaaN hotaa naheeN?

ek Harf-e-dildehee yaa ik nigaah-e-iltifaat
tujh se itnaa bhee to ai jaan-e-jahaaN hotaa naheeN

be-t^alab hee jaan de dete haiN ahl-e-aarzoo
sajdah-e-ulfat raheen-e-Sad-aZaaN hotaa naheeN

jaan hee denee hai to kyaa hijr aur kaisaa wiSaal
a'ashiqee meN to Khayaal-e-een-o-aaN hotaa naheeN

isqadar maanoos dunyaa kee suKhan-saazee se hooN
baat sun letaa hooN lekin sar-giraaN hotaa naheeN

weHshat-o-aashuftagee meN Hadd-e-imkaaN se guzar
faash warnah Husn kaa sirr-e-nihaaN hotaa naheeN

waqt woh aayaa hai jab koyee naheeN pursaan-e-Haal
:teree Soorat par bhee ab teraa gumaaN hotaa naheeN:

kyaa gayaa meraa dil-e-betaab haathoN se nikal?
kal jahaaN thaa dard pyaare! ab wahaaN hotaa naheeN

aa hee jaataa hai laboN par shikwah-e-aazurdagee
dil dukhe :Sarwar: to phir Z^abt^-e-fuGhaan hotaa naheeN

غزل