ho gayee me'raaj-e-i'shq-o-a'ashiqee HaaSil mujhe

ho gayee me'raaj-e-i'shq-o-a'ashiqee HaaSil hameN
:pehle dard-e-dil milaa, ba'd us ke daaGh-e-dil hameN!:

bandagaan-e-aarzoo meN kar liyaa shaamil hameN
aap ne, shukr-e-Khudaa! samjhaa kisee qaabil hameN!

kam-nigaahee, taNg-daamaanee, wufoor-e-aarzoo
zndagee! teree t^lab meN yeh huwaa HaaSil hameN!

is qadar aasoodah-e-raah-e-muHabbat ho gaYe
DhooNDtee phirtee hai har soo shorish-e-manzil hameN

lamHah lamHah, leHz^ah leHz^eh, woh qareeb aate gaYe
raftah raftah kar gaYe Khud aaps se Ghaafil hameN!

ban gayaa Khud apnaa HaaSil a'alam-e-Khudraftagee
dekhtee hee reh gayee dunyaa-e-aab-o-gil hameN

deedah-e-beenaa, dil-e-Khushkaam, fikr-e-beniyaaz
ab koyee mushkil naz^ar aatee naheeN mushkil hameN!

Khud ko hee taareeKh duhraatee hai jab "Sarwar" to phir
kyoN naz^ar aayaa naheeN maaZ^ee meN mustaqbil hameN?

غزل