zamaane kee adaa hai kaafiraanah

zamaane kee adaa hai kaafiraanah
judaa meraa hai t^arz^-e-a?shiqaanah

tiraa Zauq-e-t^alab naa-mehrimaanah
nah aah-e-SubH, nay soz-e-shabaanah

shabaab-o-she'r-o-SeHbaaYe-muHabbat
bohat yaad aaYe hai guzraa zamaanah

:cheh nisbat Khaak raa baa a'alam-e-paak?:
kahaaN maiN aur kahaaN woh aastaanah

bohat naazuk hai har shaaKh-e-tamannaa
banaaYeN ham kahaaN phir aashiyaanah?

makaaN jo hai woh a'ks-e-laamakaaN hai
agar teree naz^ar ho a'arifaanah!

miree aah-o-fuGhaaN ik nai-nawaazee
miraa Harf-e-shikaayat shaa,i'raanah

maiN naz^reN kyaa milaataa zindagee se
uTheeN, lekin uTheeN woh mujrimaanah


hamaaree zindagee kyaa zindagee hai
magar ik saaNs lene kaa bahaanah

mujhe dekho, miree Haalat nah poochho
mujhe aataa naheeN baateN banaanaa

ulajh kar reh gayaa maiN roz-o-shab meN
samajh meN kab yeh aayaa taanaa-baanaa

nah dekhoo, is t^araH mujh ko nah dekho
bikhar jaa,ooN gaa ho kar daanah-daanaa

mujhe hai har kisoo par Khud kaa dhokaa
yeh duniyaa hai keh hai aaeenah-Khaanah?

nikaalo raah apnee aap :Sarwar:
kabhee duniyaa kee baatoN meN nah aanaa!

غزل