mire jab bhee qareeb aayee bohat hai

mire jab bhee qareeb aayee bohat hai
yeh dunyaa maiN ne Thukraayee bohat hai!

maiN samjhotaa to kar looN zindagee se
magar z^aalim yeh harjaayee bohat hai!

tumheN sarshaaree-e-manzil mubaarak
hameN yeh aablah-paayee bohat hai!

kahaaN maiN aur kahaaN teree tamannaa
magar yeh dil! keh saudaayee bohat hai!

balaa se gar naheeN suntaa hai koyee
majaal-o-taab-e-goyaayee bohat hai

maiN Hasrat-aashnaa-e-aarzoo hooN
miree Gham se shanaasaayee bohat hai!

maiN Khud ko DhooNDtaa hooN anjuman meN
mujhe eHsaas-e-tanhaayee bohat hai!

:nah aayee yaad to barsoN nah aayee
magar jab aayee to aayee bohat hai!:

miree rindee ba-raNg-e-paarsaayee
Hareef-e-Khauf-e-ruswaayee bohat hai

zamaaneh ko shikaayat hai yeh "Sarwar"
keh tujh meN boo-e-Khudraayee bohat hai!

غزل