voh Husn-e-balaaKhez, yeh andaaz-e-muHabbat!

voh Husn-e-balaaKhez, yeh andaaz-e-muHabbat!
aisaa nah ho kh`ul jaaYe kaheeN raaz-e-muHabbat!

maiN jab huwaa shaa,istah-e-e'jaaz-e-muHabbat
Khaamoshee miree ban gayee aavaaz-e-muHabbat

her Zarrah-e-hastee huwaa hamraaz-e-muHabbat
jab soz-e-muHabbat meN milaa saaz-e-muHabbat!

yeh rasm-e-vafaa Sirf hamaare hee liYe hai
auroN kaa judaa is se hai andaaz-e-muHabbat!

har lamHa-e-Gham vajh-e-sukooN ban gayaa kaise?
Allah re guhar-baaree-e-eejaaz-e-muHabbat!

jo dil pe guZartee hai voh kis dil se bataaYeN?
anjaam banaa jaataa hai aaGhaaz-e-muHabbat

ham teerah-naSeeboN kaa muqaddar hai to yeh hai
afsaanah huwaa jaataa hai her raaz-e-muHabbat

dunyaa kee nigaahoN meN buraa ban gayaa :Sarwar:
jis din se huwaa zamzamah-pardaaz-e-muHabbat!

غزل