yehee rahee jo tiree be-ruKhee to kyaa ho gaa?

yehee rahee jo tiree be-ruKhee to kyaa ho gaa?
"isee t^araH se kaTee zindagee to kyaa ho gaa?"

kareN to kaise kareN e'tibaar hastee kaa
miyaan-e-wehm-o-yaqeeN gum huyee to kyaa ho gaa?

idhar hai be-Khudee-e-shauq, udhar Khudee meree
jo Had se baRh gayee yeh be-Khudee to kyaa ho gaa?

tumhaare waast^e hai dil-lagee muHabbat bhee
jo dil-lagee banee dil kee lagee to kyaa ho gaa?

miraa nafas nafas icbaat-e-Zaat kaa t^aalib
huyee Hayaat Khud apnee nafee to kyaa ho gaa?

Khudaa na-Khwaastah gar a'am ho gayee pyaare!
zamaane bhar meN kahee-ankahee to kyaa ho gaa?

Khirad ko fikr hai weHshat kee chaarah-saazee kee
nah aayee kaam yeh sheeshah-garee to kyaa ho gaa?

talaash-e-Zaat meN aisaa maqaam gar aayaa
nah aadamee ko milaa aadamee to kyaa ho gaa?

abhee to shauq-e-naz^aaraa hee ham ko sab kuchh hai
miTee nah phir bhee agar tishnagee to kyaa ho gaa?

Hayaat ke yeh taqaaZ^e, are ma,a'aZ-Allah!
kisee t^araH jo nah is se banee to kyaa ho gaa?

hameN hujoom-e-anaa meN naz^ar nah aayee agar
Khud-aagahee meN Khudaa-aagahee to kyaa ho gaa?

yeh baat baat peh "Sarwar" tiree Ghazal-Khwaanee
nah samjhaa koyee tiree faarsee to kyaa ho gaa?

غزل