dard se jaane gaYe, aahoN se pehchaane gaYe

Ghazal

dard se jaane gaYe, aahoN se pehchaane gaYe
mujh se pehle bazm meN jab mere afsaane gaYe

anjuman meN teree jab jab tere deewaane gaYe
shama' sar dhuntee rahee, qurbaan parwaane gaYe

saaqee-e-Khushkaar kee mo'niz-numaayee dekhiYe
jis t^araf naz^reN uTheeN, us samt paimaane gaYe

waqt aayaa to nazar aayaa nah koyee door door
dost sab apne isee u'nwaan pehchaane gaYe

ham bataaYeN kyaa huwe saare butaan-e-aarzoo
kuchh gaYe soo-e-Haram aur kuch Sanam-Khaane gaYe

chand KhwaaboN par binaa rakkhee thee ham ne zeest kee
aaNkh kholee to kahaaN woh sab Khudaa jaane gaYe

jaan-o-dil, a'ql-o-Khirad, i'lm-o-yaqeeN, wehm-o-gumaaN
ho buraa is i'shq kaa sab apne begaane gaYe

ham haiN aur dunyaa peh hai ik naa-muraadaanah nigaah
aaYe the anjaan sab se aur anjaane gaYe

ek ummeed-e-karam aur ik du,a'a-e-naatamaam
door tak raah-e-fanaa meN ham ko poNhchaane gaYe

yaad ne Daale haiN Dere kaar-gaah-e-shauq meN
gaahe gaahe ham bhee waaN is dil ko behlaane gaYe

dil woh ik naadaaN keh suntaa hee naheeN hai koyee baat
tum bhee "Sarwar" jaane kis z^aalim ko samjhaane gaYe

DhooNDte ho ab yahaaN kyaa "Sarwar"-e-darwesh ko
SaaHeb-e-dil jis qadar the, kab ke mai-Khaane gaYe!

غزل