Husn jab be-niqaab hotaa hai

Husn jab be-niqaab hotaa hai
aap apnaa javaab hotaa hai!

i'shq par jab shabaab hotaa hai
aadmee ph`ir Kharaab hotaa hai!

jab bh`ee ham se Khitaab hotaa hai
bas vohee ik javaab hotaa hai!

jis ko dunyaa i'taab kehtee hai
karam-e-beHisaab hotaa hai!

raNg laaYe luhoo GhareeboN kaa
yooN bh`ee a'alee-janaab! hotaa hai

yeh lagee dil kee, dil-lagee to naheeN
is meN Khaanah Kharaab hotaa hai!

aap bh`ee kaisee baat karte haiN?
i'shq bh`ee kaamyaab hotaa hai?

kab hai :Sarwar: firaaq meN tanhaa?
dard bh`ee ham-rikaab hotaa hai

غزل