be-ruKhee! aur voh bh`ee itne naaz se?

be-ruKhee! aur voh bh`ee itne naaz se?
ik naz^ar, haaN! ph`ir usee andaaz se!

i'shq ke anjaam se Dartaa hooN maiN
kuch` chalan achh`e naheeN aaGhaaz se!

zindagee achh`ee-buree kaT hee gayee
ham niyaazaanah jiYe, tum naaz se!

kyaa tamaashah hai keh voh naaraaZ^ haiN!
dushmanee hai saaz ko aavaaz se!

i'shq kee qismat badal kar reh gayee
Husn se aur Husn ke e'jaaz se

dekh`iYe! miltee hai kab ham ko najaat
zindagee ke daur-e-soz-o-saaz se

par-bareedah kar diYaa Haalaat ne
varnah a'ajiz ham nah th`e parvaaz se

beTh`iYe ik or Ghazal sun leeji,Ye
shaai'r-e-raNgeen, :Sarwar Raz: se!

غزل